ია სართანია, ტელეკომპანია „ფორმულის“ ჟურნალისტი ჰყვება, რომ 22 აპრილს მას თბილისის მეტროში კაცმა ხელი ჰკრა და სიტყვიერი შეურაცხყოფა მიაყენა. ჟურნალის თქმით, უცნობმა კაცმა მის ტატუებზე გაამახვილა ყურადღება. „მხარზე დამადო, ცოტა მჭიდროდ ხელი, გამწია, ხელი მკრა და შემდგომ გადაინაცვლა ჩემს მოპირდაპირე მხარეს - მაგინა, უშვერი სიტყვები მაკადრა, ტატუებზე ამახვილებდა ყურადღებას, ციხიდან გამოსული მეძახა, მეუხერხულება იმ სიტყვების გამეორება, რა სიტყვებიც მეძახა. შემდგომ, მატარებელი გაჩერდა და ვთხოვე მძღოლს, რომ აღარ გაეგრძელებინა გზა, დავუძახე პატრულს, მოვიდნენ, გამოიყვანეს“, - თქვა „ფორმულის“ ეთერში ია სართანიამ. შინაგან საქმეთა სამინისტროს პრესცენტრში რადიო თავისუფლებას უთხრეს, რომ ფაქტზე დაიწყო ადმინისტრაციული მოკვლევა. გავრცელებული ცნობით, კაცი სასამართლოშია გადაყვანილი. „მინდა ვთქვა, რომ ვაგონში არავინ გამომესარჩლა, ყველას ესმოდა, რომ მაგინებდა ეს კაცი, ჩამოვედით და იქ მეხვეწებოდნენ ვიღაც ადამიანები, მოხუცია და გაუშვიო, თუმცა შემდეგ გადმოვინაცვლეთ პოლიციის განყოფილებაში, დავწერეთ ჩვენებები და ახლა, როგორც ვიცი, გადაიყვანეს უკვე სასამართლოში. სასამართლო დღეს გაიმართება", - აღნიშნა ია სართანიამ. ჟურნალისტის თქმით, თავდამსხმელს მისი საქმიანობა არ უხსენებია, თუმცა, აღნიშნა, რომ ეკავა ჩანთა, რომელზეც დატანილია, ტელეკომპანია „ფორმულის“ ლოგო: „მეც ვეუბნებოდი რომ ფორმულის თანამშრომელი ვარ“. ჟურნალისტმა ია სართანიამ „ფეისბუკის“ პირად გვერდზე გამოაქვეყნა ჩანთის ფოტო, რომელზეც ტელეკომპანია „ფორმულის“ ლოგო არის დატანილი. სპეციალურ საგამოძიებო სამსახურში გვითხრეს, რომ საქმისწარმოება მათ დაქვემდებარებაში არ არის, რადგან ფაქტი ჟურნალისტის პროფესიულ საქმიანობას არ უკავშირდება. რადიო თავისუფლება დაუკავშირდა სახალხო დამცველის აპარატს. მათ გვითხრეს, რომ კომუნიკაცია ჰქონდათ ჟურნალისტ ია სართანიასთან და ომბუდსმენი მის საქმეს შეისწავლის. ...