ევროპის ცენტრალური ბანკის თავმჯდომარემ, კრისტინ ლაგარდმა განაცხადა, რომ უკრაინის სამხედრო დახმარების დასაფინანსებლად რუსეთის გაყინული აქტივების გამოყენებას იურიდიული რისკები ახლავს თან. მისი აზრით, აქტივების გაყინვიდან მათ კონფისკაციაზე და შემდგომ განკარგვაზე გადასვლა შეიძლება მიზეზი გახდეს „იმ საერთაშორისო წესრიგის რღვევისა, რომლის დაცვაც თქვენ გსურთ; რომელსაც გსურთ, რომ რუსეთი პატივს სცემდეს“, - მოჰყავს ლაგარდის სიტყვები The Financial Times-ს. კონფისკაციის დაჩქარებული პროცედურა „წამოჭრის მთელ რიგ სხვა საკითხებს,“ რომლებიც ეხება საერთაშორისო სამართლებრივ წესრიგს, ფინანსურ სტაბილურობას და პასუხისმგებლობას, დასძინა ლაგარდმა. მან ასევე მიუთითა „უზარმაზარ ასიმეტრიაზე“ რუსეთის აქტივების განთავსებაში: ევროზონაში გაყინულია ორას მილიარდ ევროზე მეტი, აშშ-ში - მხოლოდ ექვსი მილიარდი. გარდა ამისა, საერთაშორისო ფინანსებში ევროს უფრო სუსტი პოზიცია აქვს დოლართან შედარებით, აღნიშნა ევროპის ცენტრალური ბანკის ხელმძღვანელმა. აშშ შეისწავლის გაყინული რუსული აქტივების გამოყენების რამდენიმე ვარიანტს - მათი სრული კონფისკაციიდან ობლიგაციების გამოშვებამდე, რომლებიც შესაძლებელს გახდის რუსეთის რესურსებიდან მრავალმილიარდიანი მოგების უკრაინისთვის გადაცემას რამდენიმე წლის განმავლობაში. ასეთმა ობლიგაციებმა შესაძლოა, ოპტიმისტური შეფასებებით, 30-40 მილიარდი ევრო მოგება მოიტანოს შემდგომი ათი წლის განმავლობაში და 50-60 მილიარდი - 15-20 წლის განმავლობაში. ვაშინგტონი ითხოვს ევროკავშირში გაყინული რუსული სახსრების უკრაინისთვის გადაცემას. ევროკავშირის ქვეყნები ამჯობინებენ, უკრაინას გადაეცეს მხოლოდ მოგება ამ საბაზო აქტივებიდან. ეს ზომა უკრაინისთვის ყოველწლიურად სამ მილიარდამდე ევროს გამოყოფას გახდიდა შესაძლებელს. ეს წინადადება ევროკავშირის მარტის სამიტზე განიხილეს, მაგრამ საბოლოო გადაწყვეტილება არ მიუღიათ. რუსეთის რეზერვების უკრაინის დასახმარებლად გამოყენების საკითხი აქტუალური გახდა უკანასკნელი თვეების განმავლობაში, ვინაიდან ომი უკვე მესამე წელია გრძელდება, აშშ-დან დამატებითი დახმარების საკითხის გადაწყვეტა კი კონგრესში ფერხდება. ...