სასამართლო სხდომა საქალაქო სასამართლოში, რომელზეც მოსამართლე გიორგი არევაძეს უნდა ემსჯელა ყოფილი პრეზიდენტის, მიხეილ სააკაშვილის სასჯელისგან გათავისუფლებაზე ან სასჯელის გადავადებაზე, დაახლოებით 20 წუთს გაგრძელდა და ამ საკითხის განხილვის გარეშე დასრულდა. მომდევნო სხდომა 14 დეკემბერს, 11 საათზე დაინიშნა. სხდომის გადადების მიზეზი ის გახდა, რომ თავისივე მოთხოვნის მიუხედავად, მიხეილ სააკაშვილი სასამართლოში არ მიიყვანეს. პენიტენციურმა დაწესებულებამ წარადგინა საავადმყოფოდან გამოგზავნილი წერილი, რომლის მიხედვითაც, ექიმები მოცემულ მომენტში სააკაშვილის ტრანსპორტირებას მიზანშეწონილად არ მიიჩნევენ. ამ დოკუმენტს ხელს კლინიკა "ვივამედის" კლინიკური დირექტორი ზურაბ ჩხაიძე და სააკაშვილის მკურნალი ექიმი თამარ დავარაშვილი აწერენ. სხდომაზე დროულად ვერ გადაწყდა ვერც ის, შეუძლია თუ არა სასამართლოს „ვივამედიდან“ ონლაინ ჩართოს სააკაშვილი. მოსამართლე გიორგი არევაძემ სხდომა სწორედ იმის გამო გადადო, რომ ექსპრეზიდენტი მასში მონაწილეობას ვერ ახერხებდა. მისი თქმით, 14 დეკემბრისთვის უკვე ცნობილი იქნება, შეძლებს თუ არა მიხეილ სააკაშვილი ფიზიკურად სხდომაზე დასწრებას ან იქნება თუ არა შესაძლებელი მისი დისტანციურად ჩართვა. "სასამართლომ ფაქტობრივად ამ საკითხთან დაკავშირებით იმსჯელა, გამოთქვა მზადყოფნა და თქვა, რომ დაავალებდა პენიტენციურ სამსახურს ჩართონ მიხეილ სააკაშვილი იმის გამო, რომ მისი ტრანსპორტირება ვერ ხერხდება. ტექნიკურად როგორ მოხერხდება, ამის გადასაწყვეტად ორი კალენდარული სამუშაო დღე ითხოვა, გრაფიკი შემოგვთავაზა, ჩვენ ამ გრაფიკს დავეთანხმეთ", - უთხრა მედიას სააკაშვილის ადვოკატმა შალვა ხაჭაპურიძემ სხდომის დასრულების შემდეგ. სწორედ მან მიმართა სასამართლოს ექსპრეზიდენტის სასჯელისგან გათავისუფლების ან სასჯელის გადავადების შუამდგომლობით. ეს მოთხოვნა დღის წესრიგში მას შემდეგ დადგა, რაც ცნობილი გახდა ექსპერტიზის დასკვნები მიხეილ სააკაშვილის ჯანმრთელობის მდგომარეობის შესახებ. три სააკაშვილის საქმეზე სასამართლო პროცესის პარალელურად, აქცია მიმდინარეობდა სასამართლოს ეზოშიც - პოლიტიკოსები და მოქალაქეები ამ გზით უცხადებდნენ მხარდაჭერას ყოფილ პრეზიდენტს. три სასამართლოს ამ საქმეზე მოსამართლის სტატუსით მიმართა სახალხო დამცველმაც - მისი კონსილიუმი მიიჩნევს, რომ სააკაშვილის დიაგნოზი მეოთხე ხარისხის კახექსიაა და თუკი ყოფილი პრეზიდენტი წონის კლებას ამ ტემპით გააგრძელებს, რამდენიმე თვეში მისი სიცოცხლე საფრთხის წინაშე აღმოჩნდება. მსჯავრდადებული მიხეილ სააკაშვილი ექიმების მეთვალყურეობის ქვეშ 2022 წლის 12 მაისიდან იმყოფება კლინიკა "ვივამედში." ხელისუფლება ამბობს, რომ სახელმწიფო ყველაფერს აკეთებს მისი ჯანმრთელობისთვის, მაგრამ პაციენტი მკურნალობას რთულად ემორჩილება. ...